| [1] | afferma et en bonne verité recognut que, comme contens et debas feussent meuz entre lui, d'une part, et religieuses personnes l'abbé et couvent de Saint Magloire de Paris, d'autre, pour raison de certaines veuez et esgous qui sont es mesons dudit Guillaume, pardevers les jardins des diz religieus, les quelles sont assisez a Paris, en la grant rue Saint Denys, a l'opposite de la Cossonnerie, tenant, d'une part, a la meson Gautier le Marinier, tallemelier, et, d'autre part, a la meson Guillaume de Royon, lombart, tavernier, et aboutissant par derrerres aus jardins des diz religieus, es quelles veues et esgous yceuls religieus metoient ou se efforçoient de mettre empeeschemens, si comme il disoit, pour quoy icelui Guillaume, de sa bonne volenté, sur ce bien avisez, et pour touz plaiz, ryos et coustemens eschiver, voult et acorda et en ce se consenti expressement et promist, par son serement et par la foy de son corps, rendre et paier chascun an, d'ores en avant, durant le cours de la vie dudit Guilaume tant seulement, aus diz religieus et a leurs successeurs ou au porteur de ces lettres, quatre souls et cinc deniers par. de crois de cens avecques autres quatre souls et cinc deniers par. de crois de cens ou de rente que icelui Guillaume leur doit chascun an pour cause des dites mesons, a deus termes en l'an, moitié a Pasques et moitié a la Saint Remy, par si et en telle maniere que toutes les dites veues et esgous des dites mesons seront et demouront desorendroit a touz jours, durant le cours de la vie du dit Guillaume, ou point et en l'estat ou il sont a present, sanz ce que les diz religieus ou leurs successeurs y mettent ou puissent mettre empeschement aucun ou temps a venir, et que, aprés le decés d'icelui Guillaume, ses hoirs auront et tendront les dites veues et esgous en la manniere que il sont a present, par paiant aus diz religieus la dite somme d'argent chascun an, aus termes dessus diz ; (Chartes Abb. St-Magl. T.F., t.3, 1330-1436, 47) | | [2] | Sachent tuit que pardevant nous vint en jugement Gautier le Marinier, tallemelier, et recongnut que, comme des environ la feste sainte Katherine qui fu l'an mil CCC trente et huit il eust esté bannis du royaume de France pour la souspeçon de la mort de Pierre de Nangis, jadiz pasticier, et pour ce touz ses biens aient esté acquiz aus relegieuz de Saint Magloire, et depuis li rois nosire li eust et ait remis et quittié le dit ban, et ait esté absolz dudit fait, et depuis tout ce ait acheté des diz relegieuz tout tel droit comme il avoient acquiz es heritages qui avant ledit banissement estoient audit Gautier, assis en la jurisdicion des diz relegieuz, et aussi tout tel droit comme yceuls relegieuz avoient en tout ce qui encores estoit et est a paier des debtes qui deues estoient audit Gautier avant ledit banissement tant par gagemens, tailles, pappiers et autrement, parmi et pour certeine somme d'argent, sicomme plus a plain est contenu en lettres sur ce faites, seellees du seel sic de ladite prevosté de Paris, ycelui Gautier avoit eu et receu de frere Brice de Ploirart, prevost, moinne de Saint Magloire, a plain toutes les lettres, tailles, pappiers faisons sic mencion des debtes, qui trouvez avoient esté en faisant l'inventaire qui fait estoit et avoit esté des diz biens, et qui jadiz avant ledit ban et au temps d'icelui li estoient deues, les quiex biens li avoient esté venduz, comme dit est. (Chartes Abb. St-Magl. T.F., t.3, 1330-1436, 95) | | [3] | les quiex Robert et sa femme, de leurs bons grés, bonnes vollentés, de leurs certaines sciences et propres mouvemens, senz force, fraude, contrainte ou decevance, et pour leur tres grant, cler et evident prouffit, et sur ce bien advisiez, consseilliez et adcertenez, recongnurent et confessierent pardevant les diz clers notaires jurez euls avoir prins et retenu, prennent et retiennent par la teneur de ces presentes lettres a droite rente ou penssion annuelle, chascun an doresenavant, a la vie des diz Robert et sa femme, et de Jehan Falle, frere de icelui Robert, et de Agnés, leur suer, femme de Richart de Pons, mercier, bourgois de Paris, et du seurvivant des diz Robert, Jehanne, Jehan et Agnés, en quelque point, estat, habit ou religion que il soient ou deviengnent, la vie de eulx quatre et du seurvivant pour le tout, de religieuses personnes et honnestes l'abbé et le couvent de l'eglise Saint Magloire de Paris, ce qui enssuit, c'est assavoir une quentité de jardin qui est au bout des jardins des diz religieus, joingnant et aboutissant a la maison des diz Robert et sa femme, - et conmence le bout d'icelui jardin du dit trettié a la maison qui jadiz fu Gautier le Marinier, tallemelier, et a icelui jardin qui est prins de nouvel en icelui bout dessus dit qui joingt audit Gautier le Marinier trois toises et quatre piez, trois doie ou environ meins, de lé, comprins dedenz l'espoisse du mur dont il sera fermé, et se yra fermer tout au lonc jusques a un mur de plastre qui va au travers du jardin des diz religieus, en retournant encontre l'eglise du Sepulcre, et a de lé en icelui endroit du Sepulcre cinq toises et trois piez et demy de lé ou environ, et aura icelle closture du long unze toises de long ou environ, - par ainssi que les diz preneurs, c'est assavoir les diz Robert et sa femme, seront tenus et promistrent et gagierent es mains des diz notaires jurez rendre et paier aus diz religieus, a leurs successeurs et aians cause ou au porteur de ces lettresou le transcript d'icelles fait souz le seel de la dite prevosté de Paris, la sonme de soissante soulz par. de rente ou penssion annuelle, pour cause et raison du dit jardin par eulx prins, chascun an doresenavant, les vies d'eulz et des dessus nonmez durans, egalment par les quatre termes en l'an generalment a Paris acoustumez, en et sur le dit jardin et sur la maison des diz Robert et sa femme qui y joingt, si conme icelle maison se comporte, et sur toutes ses appartenances et appendances quelconques, la quelle maison tient, d'une part, au dit jardin et, d'autre part, a la dite eglise du Sepulcre ; (Chartes Abb. St-Magl. T.F., t.3, 1330-1436, 365) |
|
|
Attestation de 