| [1] | Or, comme veult l'ordre du tiltre, Fault traictier du second chapitre De la partie derrenière, Contenant très belle matière, Pour laquele mieulx exposer Il faut noter et supposer Que des choses, qui défensives Sont de la boce et curatives, Aucunes servent à mengier,Et aussi contre le dangier, Comme aulx, aisil, trinchon et lait, Cler et poignant, de burre net, Et autres valent proprement à médicine seulement Comme la terre appellée Vulgairement terre séellée, Bole d'Arménie et triacle, Et agaric, sans point de macle, Et autres choses resemblables Maiz des susdictes et trouvables Il fault noter premièrement Du vin aigre soigneusement, Duquel user par tempérance Vault moult en temps de pestillence, Soit en saulse, ou soit en potage, Ou en vin, ou autre bevrage, Car, pour sa double qualité Qui sont froidure et siccité, Il est contraire à pourreture, Laquele prend engendréure D'une chaleur accidentèle Corrompant l'umeur naturèle, Et maint Sage si veult et ditQu'il soit bon lors mettre un petit De vin aigre dedens le pain, Quant on le fait, et pour certain Il vault aussi de tout costé Prendre au matin du pain tosté Taint en vin aigre, sans mesleure, Ou en vin aigre et eaue pure, Ou en bon vin mixtionné De tel liqueur comme est sonné, Et, s'il avenoit que l'usage De vin aigre feroit dommage à l'estomac pour sa froidure, Ou autrement par aventure, Il fauldroit rompre sa malice [Par] cynamome à ce propice, Ou par eaue de mastic boire, Qui au gisier fait moult de gloire. (LA HAYE, P. peste, 1426, 123) |
|
|
Attestation de 