| [1] | Savoir faisons que pardevant Jehan de Pronneroy et Phelippe du Vivier, clers notaires jurez du roy nostre sire de son Chastellet de Paris, personnelment establie Martine la Thierrie, merciere, bourgoise de Paris, femme de feu Jehan Voisin, laquelle pardevant les diz notaires jurez comme en droit pardevant nous, de son bon gré, de sa bonne volenté et certaine science, sanz force, fraude, erreur, contraincte ou decevance aucune, transporta, quitta, cessa, ottroya, mist et du tout en tout delaissa, desmaintenant a touz jours mais, perpetuelment et heritablement,a religieuses personnes et honnestes l'abbé et couvent de l'eglise de Saint Magloire de Paris, pour euls, pour leurs successeurs et ayanz d'euls cause en la ditte eglise, les huit livres six soulz huit deniers par. de cres de cens ou rente annuele et perpetuele, dont mencion est faite es lettres seellees du seel de la prevosté de Paris parmy les quelles ces presentes lettres sont annexees, que elle se disoit avoir acheté et conquesté, et de son conquest paisiblement tenir, posseoir, prendre et recevoir par chascun an, aus termes et par la maniere et sur les lieux plus plainement especifiez et esclarciz es dittes lettres parmy les quelles ces presentes sont annexees, comme dit est, avecques tout le droit, toute la proprieté, fons, possession, raison, seignorie, saisine et action quelconques que elle avoit, povoit et devoit avoir es huit livr. six soulz huit deniers paris. de cres de cens ou rente par an dessus diz, es lieux sur quoy il sont prins et euz, comme desclarci est es dittes lettres, et envers quelconques personnes et leurs biens pour raison de ce, sanz aucune chose excepter, retenir y ne reclamer pour elle ne pour ses hoirs, c'est assavoir ce present transport et delaissement fait en acquict, deducion et admenuisement de la somme de seize livres par. de cres de cens ou rente par an que elle estoit tenue, et avoit et a promis baillier, asseoir et assigner aus diz religieux, abbé et couvent, a cause et pour raison d'une chappelle ja pieça fondee et edesfiee en la ditte eglise Saint Magloire par elle et le dit feu Jehan Voisin, son mari, des le vivant d'ycellui, et pour toute sa moitié et partie de trente deux livres par. de cres de cens ou rente par an, des quelles trente deux livr. par. par an elle et le dit feu Jehan avoient douee laditte chappelle et promis faire bail, assignacion et assiete en la terre et censive d'iceulx religieux, c'est assavoir elle, de seize livr. par. par an, et ledit feu Jehan, jadiz son mari, des autres seize livr. par an pour son autre moitié. (Chartes Abb. St-Magl. T.F., t.3, 1330-1436, 311) |
|
|
Attestation de 